"Global Olympiad Center" (GOC) 2024–2025-ci tədris ili ərzində beynəlxalq olimpiada və yarışmalarda fərqlənmiş şagirdlər üçün təsis etdiyi Təqaüd Proqramı 2025 çərçivəsində qalibləri müəyyən etmişdir. Təqaüd proqramının qaliblərinin adları sabah, 29 iyun saat 11:00-da rəsmi olaraq elan ediləcəkdir. Proqramın məqsədi Azərbaycanın məktəbli şagirdləri arasında elmi bacarıqları stimullaşdırmaq, onları beynəlxalq rəqabətə daha yaxşı hazırlamaq və mükafatlandırma yolu ilə təhsilə marağı artırmaqdır. GOC bu proqramla həm şagirdləri təşviq edir, həm də onlara olan etimadını nümayiş etdirir.
Təqaüdlər yalnız 2024–2025-ci tədris ili ərzində GOC tərəfindən təşkil olunmuş beynəlxalq yarışmalarda və olimpiadalarda iştirak edən və bu yarışlarda rəsmi nəticələr əldə etmiş şagirdlər arasında bölüşdürülür. Seçim meyarı şəffaf bal sisteminə əsaslanır və yalnız 70 və daha çox bal toplamış namizədlər təqaüd almaq hüququ qazanır.
Bal Sistemi:
- Qızıl medal – 10 bal
- Gümüş medal – 8 bal
- Bürünc medal – 6 bal
- Honorable Mention / Merit – 3 bal
- Participation – 1 bal
Təqaüd proqramı sentyabr ayında başlayacaq və may ayınadək – 9 ay ərzində davam edəcəkdir. Təqaüdlər aylıq əsasda təqdim olunacaq və hər qalib üçün fərdi "Təqaüd Kartı" hazırlanacaq. Bu kart vasitəsilə maliyyə ödənişləri təhlükəsiz və şəffaf şəkildə həyata keçiriləcək. Kartlar yeni tədris ilinin əvvəlində rəsmi mərasimlə təqdim olunacaq.
Təqaüd kateqoriyaları və müvafiq məbləğlər aşağıdakı kimidir:
- Heydər Əliyev adına Diamond Təqaüdü – Aylıq 100 AZN (yalnız 1 nəfərə təqdim olunur). Bu təqaüd GOC-un ali mükafatı hesab olunur və ən yüksək nəticə göstərmiş şagirdə verilir.
- Zəfər (Polad Həşimov adına) Qızıl Təqaüdü – Aylıq 80 AZN (2 nəfərə təqdim olunur). Bu təqaüd güclü liderlik, prinsipiallıq və nəticə göstəricilərinə görə fərqlənən şagirdlərə təqdim edilir.
- Lütfizadə adına Gümüş Təqaüdü – Aylıq 65 AZN (3 nəfərə təqdim olunur). Analitik düşüncəsi və ardıcıl inkişafı ilə seçilən şagirdlər bu təqaüdə layiq görülür.
- Tusi adına Bürünc Təqaüdü – Aylıq 50 AZN (3 nəfərə təqdim olunur). Bu təqaüd davamlılıq, nizam-intizam və potensial vəd edən nəticələrə görə verilir.
Qeyd olunmalıdır ki, təqaüd proqramında istifadə olunan adlar təsadüfi seçilməmişdir. Hər biri Azərbaycan xalqının elmi, mənəvi və milli yaddaşında mühüm yer tutan şəxsiyyətləri simvolizə edir və bu proqram vasitəsilə həm onların irsinə hörmət göstərilir, həm də gənclərə örnək təqdim olunur.
"Global Olympiad Center" olaraq inanırıq ki, bu təşəbbüs yalnız bugünün şagirdlərini deyil, sabahın alimlərini, mühəndislərini və elm insanlarını formalaşdırmaq üçün vacib sosial-mədəni addımdır. Qaliblərin adları GOC-un rəsmi kanallarında – vebsayt, sosial media platformaları və partnyor təşkilatlarla paylaşılacaqdır. Bütün iştirakçılara uğurlar arzu edirik və təhsil yolunda əzmkar irəliləyişlərini alqışlayırıq.