TeenEagle English 2026–2027

Seçim turu üzrə iştirakçı təlimatı

Bu təlimat Azərbaycanda keçiriləcək TeenEagle English seçim turunda iştirak edən şagird və valideynlər üçün hazırlanmışdır. Qeydiyyat, hazırlıq, imtahan günü, qiymətləndirmə və finala iştirakla bağlı qaydaları əvvəlcədən diqqətlə oxuyun.

1 Əsas məlumatlar

Gecikmə qaydası: 10:45-dən sonra iştirakçılar imtahan məkanına buraxılmır. Məkanınıza ən azı 1 saat əvvəl gəlməyiniz tövsiyə olunur.

2 İmtahan məkanları

İmtahan məkanınızı şəxsi kabinetinizdə yoxlayın. Bakı üzrə dəqiq ünvan imtahandan əvvəl şəxsi kabinetdə elan ediləcək. Digər şəhərlərdə də yekun məkan məlumatı şəxsi kabinetdəki bildirişə əsasən yoxlanılmalıdır.

3 TeenEagle English haqqında

TeenEagle English şagirdlərin ingilis dilində oxuyub-anlama, söz ehtiyatı, diqqət və təhlil bacarıqlarını yoxlayan beynəlxalq yarışmadır. İştirakçılar öz kateqoriyaları üzrə müəyyən edilmiş kitab, film və Spelling Bee söz siyahısı əsasında hazırlaşırlar. Yarışma ingilis dilindən istifadəni, müstəqil oxumağı və fikirləri əsaslandırmağı təşviq edir.

4 Seçim turu və imtahan strukturu

Kateqoriya doğum tarixinə əsasən müəyyən edilir. Sinif uyğunluğu yalnız məlumat xarakterlidir; eyni təvəllüdlü şagirdlər müxtəlif siniflərdə oxuya bilərlər.

Kitabı tam oxuyun və filmi tam izləyin. Personajlar, hadisələrin ardıcıllığı, əsas fikir, səbəb–nəticə əlaqələri və mühüm detallar üzrə hazırlaşın. Spelling Bee bölməsi üçün kateqoriyanıza aid sözlərin düzgün yazılışını öyrənin. Elan edilmiş əlavə mövzu və dəyər materiallarını da nəzərdən keçirin. Resurs keçidləri 13-cü bölmədə verilir.

5 Qiymətləndirmə meyarları

Yekun bal sual növləri üzrə düzgün cavablara verilən balların cəmi ilə hesablanır. Maksimum bal hər sual növünün sayından asılıdır və yekun imtahan bölgüsünə əsasən müəyyən olunur. Bu təlimatda sual növləri üzrə say bölgüsü göstərilmir.

• Cavabsız sual üzrə bal verilmir. Hər sual üçün yalnız bir cavab qeyd olunmalıdır.

• Səhv cavaba görə bal çıxılması barədə ayrıca qayda elan edilərsə, iştirakçılara imtahandan əvvəl bildiriləcək.

6 Mükafatlandırma və final hüququ

Yekun sıralama və mükafat statusu apellyasiya prosesi bitdikdən sonra təsdiqlənir.

Qızıl, gümüş və bürünc medal qazanan iştirakçılar 20–27 iyun 2027-ci il tarixlərində Birləşmiş Krallıqda keçiriləcək TeenEagle Global Finals mərhələsinə qeydiyyat hüququ əldə edə bilərlər. Digər uyğun nəticələr üzrə final hüququ təşkilatçının rəsmi təsdiqinə əsasən bildiriləcək.

Final hüququ avtomatik qeydiyyat və ya ödənişsiz səfər demək deyil. Final üçün ayrıca qeydiyyat, paket seçimi və ödəniş tələb olunur. Paket qiyməti, ödəniş müddətləri, daxil olan xidmətlər və ləğv şərtləri ayrıca təqdim ediləcək. Viza, nəqliyyat və digər səfər xərclərinin paketə daxil olub-olmaması həmin şərtlərdə yoxlanılmalıdır.

Final hazırlığı yalnız seçim turunun testləri ilə məhdudlaşmamalıdır. Spelling Bee, Knowledge Quiz, Debate Challenge və Writing Challenge bölmələri üzrə söz yazılışı, resurs biliyi, danışıq və yazı bacarıqları inkişaf etdirilməlidir. Yekun proqram və tələblər final üçün elan edilən rəsmi qaydalara əsasən dəqiqləşdiriləcək.

7 Nəticələr və apellyasiya

• Ödənişdən sonra şəxsi kabinetə daxil olun və qeydiyyat məlumatlarını mütəmadi yoxlayın. İmtahandan təxminən 1 həftə əvvəl məkan və vaxt barədə məlumatları yoxlayın.

• Nəticələr şəxsi kabinetdə və ya GOC-un rəsmi kommunikasiya kanallarında elan ediləcək.

• Apellyasiya müddəti və müraciət qaydası nəticələrlə birlikdə bildiriləcək. Müraciətdə ad, soyad, iş nömrəsi, kateqoriya, etiraz edilən sual nömrələri və əsaslandırma göstərilməlidir.

• Elan edilmiş müddət bitdikdən sonra apellyasiya qəbul edilmir. Baxış yekunlaşdıqdan sonra nəticələr və mükafat statusu təsdiqlənir.

8 İmtahan günü qaydaları

• Nəzarətçinin göstərişlərinə əməl edin və yalnız sizə ayrılmış yerdə əyləşin. Valideyn və müşayiətçilər imtahan zalına daxil ola bilməzlər.

• İmtahan başlamazdan əvvəl kitabçanın kateqoriyanıza uyğunluğunu, səhifələrin tamlığını və cavab kartını yoxlayın. Çatışmazlığı dərhal nəzarətçiyə bildirin.

• Başlama göstərişi verilmədən sualları cavablandırmağa başlamayın. Vaxt bitdikdə yazmağı dayandırın.

• Cavab kartını göy rəngli diyircəkli qələmlə doldurun. Ad, soyad, iş nömrəsi və kateqoriyanı düzgün yazın. Yekun qiymətləndirmə cavab kartına əsasən aparılır.

• Hər suala bir cavab qeyd edin. Birdən çox variant işarələnmiş cavab düzgün cavab kimi qəbul edilmir. Cavab düzəlişi üçün nəzarətçinin cavab kartına dair göstərişinə əməl edin.

• Telefon, smart saat, qulaqcıq və digər elektron cihazlardan istifadə qadağandır. Kitab, konspekt, lüğət və digər yardımçı materiallardan istifadə edilməməlidir.

• Sualın məzmunu, tərcüməsi və həlli barədə nəzarətçidən izah istəmək olmaz. Yalnız təşkilati və texniki problem barədə müraciət edin.

• Köçürmək, danışmaq, yardım almaq və ya göstərmək, imtahan suallarını çəkmək və paylaşmaq qayda pozuntusudur və diskvalifikasiyaya səbəb ola bilər.

• Öz ləvazimatınızdan istifadə edin; digər iştirakçıdan qələm və başqa əşya istəməyin.

• İlk 30 dəqiqə ərzində zalı tərk etmək qadağandır. İmtahanı bitirib zalı tərk edən iştirakçı yenidən imtahana buraxılmır. Səhhət və təcili ehtiyac olduqda nəzarətçiyə müraciət edin.

• Zalı tərk etməzdən əvvəl cavab kartını və tələb edilən imtahan materiallarını nəzarətçiyə təhvil verin.

9 Ödəniş və qeydiyyat dəyişikliyi

Qeydiyyatın son tarixi 18 dekabr 2026-cı ildir. Şəxsi məlumatlarınızı və ödəniş statusunu bu tarixədək yoxlayın. Qeydiyyat ödənişin təsdiqlənməsi ilə aktivləşir.

Qeydiyyat üçün edilən ödəniş geri qaytarılmır. İştirakdan könüllü imtina, imtahana gəlməmək, gecikmək, hazırlığın yetərli olmaması və qayda pozuntusuna görə diskvalifikasiya geri ödəniş üçün əsas sayılmır.

• Ad, soyad, doğum tarixi, əlaqə məlumatları və şəhərin düzgün daxil edilməsinə görə valideyn və iştirakçı məsuliyyət daşıyır. Kateqoriya doğum tarixinə əsasən təyin edilir.

• Məlumat düzəlişi və şəhər dəyişikliyi üçün müraciəti imtahandan əvvəl təqdim edin. Dəyişiklik yalnız təşkilatçının təsdiqi və mövcud imkanlar daxilində edilir.

• Ödənişin başqa iştirakçıya və ya başqa yarışmaya keçirilməsi avtomatik hüquq yaratmır; belə müraciətlər yalnız təşkilatçının ayrıca təsdiqi ilə mümkün ola bilər.

• İmtahan günü və imtahandan sonra qeydiyyat dəyişiklikləri qəbul olunmaya bilər. Seçim turunun ödənişi final paketinin ödənişini əvəz etmir.

10 Sertifikat və mükafatların təqdim olunması

• Medal qazanan iştirakçılar medal və sertifikatlarını mükafatlandırma mərasimində əldə edə bilərlər. Mərasimin vaxtı və məkanı ayrıca elan ediləcək.

• Mərasimə qatılmayan medalçılar mükafatlarını təşkilatçının elan etdiyi müddət ərzində ofisdən götürə bilərlər.

• Elektron sertifikatların təqdim olunması və yüklənməsi qaydası şəxsi kabinetdə bildiriləcək. Sertifikatdakı ad və soyad qeydiyyat məlumatlarına əsasən hazırlanır.

11 Təşkilati dəyişiklik hüququ

Global Olympiad Center iştirakçı sayı, məkanın texniki imkanları, təhlükəsizlik və digər təşkilati səbəblərlə bağlı imtahan məkanını və ya saatını dəyişə bilər. Dəyişikliklər şəxsi kabinet və rəsmi kommunikasiya kanalları vasitəsilə bildiriləcək. İştirakçılar imtahana gəlməzdən əvvəl son bildirişləri yoxlamalıdırlar.

12 İmtahan günü üçün qısa yoxlama siyahısı

13 Hazırlıq materialları və nümunə suallar

Bu mövsüm üçün öz kateqoriyanıza aid kitabı, filmi və elan edilmiş hazırlıq materiallarını istifadə edin. Əvvəlki illərin sualları formatla tanış olmaq və məşq etmək üçündür; bu ilin suallarının eyni olacağına zəmanət vermir.

2026–2027 mövsümü üzrə kitab və film materialları
https://drive.google.com/drive/folders/1W4DjYpjPQQ4jAhU7LKjPwyzWz21PWoLI?usp=sharing

Əvvəlki illərdən nümunə suallar
https://drive.google.com/drive/folders/10ulk_9d9GOJ8GilnnNAHzcdkUaN0czRG?usp=sharing

Hazırlıq ardıcıllığı: kitabı oxuyun, filmi izləyin, mühüm hadisə və personajlar üzrə qeydlər aparın, söz siyahısını təkrarlayın və nümunə testləri vaxt məhdudiyyəti ilə həll edin. 80 sualı 60 dəqiqədə cavablandırmağa və cavabları karta vaxtında köçürməyə məşq edin.

TeenEagle English 2026–2027 seçim turunda bütün iştirakçılara uğurlar arzulayırıq!