Brainiacs Olimpiadasının seçim mərhələsi Bakı Biznes Universitetində təşkil olunub. Seçim turu iki hissədən ibarət olub: səhər saat 11:00-da riyaziyyat fənni üzrə, günorta saat 15:00-da isə kimya, fizika və biologiya fənləri üzrə imtahanlar keçirilib.
Bu mərhələdə şagirdlər 20 sualdan ibarət test imtahanında iştirak ediblər. Suallar çətinlik səviyyəsinə görə 3 kateqoriyaya bölünüb:
5 sual asan,
10 sual orta,
5 sual isə çətin səviyyədə olub.
Qiymətləndirmə 100 ballıq sistem üzrə aparılıb və 40 baldan yuxarı nəticə əldə edən şagirdlər final mərhələsinə vəsiqə qazanıb.
Bu olimpiada Çinin Xiamen Universiteti tərəfindən təşkil olunur. Xiamen Universiteti Asiyanın ən güclü 50 universitetindən biridir və olimpiada çərçivəsində 11-ci sinif şagirdlərinə qəbul imkanı yaradılır. Olimpiadanın finalında uğur qazanan şagirdlər universitetdə 25%-dən 100%-ə qədər təqaüd qazanmaq şansı əldə edəcəklər.
Brainiacs Olimpiadasının final mərhələsi 26-31 aprel tarixlərində Malaziyanın paytaxtı Kuala Lumpur şəhərində baş tutacaq. Olimpiadanın nəticələrinə əsasən uğur qazanan şagirdlər aprelin 5-də təşkil olunacaq mükafatlandırma mərasimində təltif ediləcəklər.
Bu olimpiada istedadlı gənclərə beynəlxalq arenada öz bacarıqlarını nümayiş etdirmək və gələcək akademik karyeralarında irəliləyiş əldə etmək üçün böyük bir fürsət təqdim edir.