8 mart 2025-ci il tarixində Azərbaycanda Bakı ilə yanaşı, daha 3 mərkəzdə (Naxçıvan, Gəncə, Sumqayıtda) eyni anda Türk Beynəlxalq Riyaziyyat Olimpiadasının (TIMO) ölkə mərhələsi baş tutub.
Ölkəmizdən minlərlə şagird bu mərhələdə uğurlu nəticə göstərərək beynəlxalq mərhələyə vəsiqə qazanmaq üçün mübarizə aparıb.
Bu ilki yarışda Dövlət Sosial Müdafiə Fondunun təşəbbüsü ilə xüsusi həssas qrupa aid 32 nəfər şagirdə dəstək verilib: Vətən müharibəsi şəhidləri və qazilərinin 3-cü sinifdən 11-ci sinifə qədər olan övladları ölkə mərhələsində ödənişsiz olaraq iştirak ediblər.
TIMO-nun əsas məqsədi şagirdlər arasında riyaziyyata marağı artırmaq, onların riyazi bilik və bacarıqlarını inkişaf etdirmək, eyni zamanda onları beynəlxalq səviyyəli yarışlara hazırlamaqdır. Olimpiadada iştirak edən şagirdlər gələcəkdə həm universitetlərə qəbul prosesində, həm də təhsil təqaüdlərinin əldə olunmasında əlavə üstünlük qazanacaqlar.
Seçim turunun ilk nəticələri açıqlanıb.Hər bir şagird şəxsi kabinetinə daxil olaraq cavab kartlarına baxa hansı suala düzgün və səhv cavab verdiyinə baxa bilərlər. Cavablar açıqlandıqdan sonra Appelyasiya mərhələsi başlayıb. 24 saat ərzində hansı sualla bağlı şikayət olunarsa, həmin suallara baxılacaq.
