Tailandın paytaxtı Banqkokda keçirilən International Math Challenge-da şagirdlərimiz Global Olympiad Center-in dəstəyi ilə Azərbaycanı müvəffəqiyyətlə təmsil ediblər. 12-17 fevral tarixlərində Tailand Təhsil Nazirliyi tərəfindən təşkil olunan yarışmada dünyanın 80-dən çox ölkəsi qalib adı uğrunda mübarizə aparıb. Bu xüsusda, müxtəlif məktəblərdən ibarət Azərbaycan komandası 16 şagirdlə 5 kateqoriyada zəkalarını nümayiş etdiriblər. Belə ki, Cüneyd Qənbərov qızıl; Daria Dmitriyeva, Davud Adışirinli, Cəsur Əlizadə, Paşa Cabbarlı gümüş; Əli Cəbrayılzadə, Aslı Topalova, Nilay Mustafayeva, Ayxan Abbaslı, Mehdi İbrahimov bürünc medal əldə ediblər. Digər şagirdlərimiz Minayə Hacılı, Əli Hüseynzadə, Yusif Abbasov, Əlixan Əsədov, Yusif Qocayev, Mixail Dmitriyev isə fəxri fərmana layiq görülüblər. 16 fevral tarixində keçirilən mükafatlandırma mərasimində Azərbaycan Respublikasının Tailanddakı fövqəladə və səlahiyyətli səfiri Elçin Bəşirov iştirak edib, şagirdlərə uğurlar arzulayıb. Mükafatlandırmada Tailand Təhsil Nazirliyinin, Mədəniyyət Nazirliyinin və digər dövlət qurumlarının yüksək vəzifəli şəxsləri, 10-a yaxın ölkədən səfir və baş konsul, eyni zamanda universitet rektorları qaliblərə medal və sertifikatlarını təqdim edib. Qeyd edək ki, International Math Challenge-ın Azərbaycan üzrə seçim turu 9 noyabr tarixində keçirilib, müsabiqəni uğurla başa vuran şagirdlər Tailandda keçirilən final mərhələsinə ölkəmizi təmsil etmə hüququ əldə ediblər.
