Azərbaycan Milli İqtisadiyyat Olimpiadasının seçim turunun nəticələri elan olunub. İki kateqoriyada yarışan şagirdlərin göstərdikləri nəticəyə əsasən ilk 30 faizə düşən gənc iqtisadiyyatçılar final mərhələsinə keçib. Bu mərhələdə Juniorlar kateqoriyasında Dəyanət Liseyinin şagirdi İmran Quliyev, Seniorlar kateqoriyasında isə Elitar Gimnaziyanın şagirdi Daniyar Əliyev 100 faizlik nəticə əldə ediblər. Azərbaycanda artıq ikinci dəfə keçirilən Milli İqtisadiyyat Olimpiadasının seçim mərhələsində şagirdlərin nəticəsində ötən illə müqayisədə yüksəliş qeydə alınıb. Fevralın 9-da bütün regionlar üzrə finala vəsiqə qazanan şagirdlər Bakı Biznes Universitetində təşkil olunacaq final mərhələsində iştirak edəcəklər. Final mərhələsində şagirdlər iki kateqoriyada Junior və Senior olaraq mübarizə aparacaqlar. Bu mərhələdə şagirdlərə 20 qapalı, 5 açıq tipli sual veriləcəkdir. AzMİO-nun finalında medal qazanan şagirdlər IEO (International Economics Olympiad) əsas mərhələsində ölkəmizi təmsil edəcək 2 komandanı müəyyən edəcəklər. Qeyd edək ki, IEO iyulun 20-29 aralığında 71 ölkənin iştirakı ilə Bakıda təşkil olunacaq.
