Beynəlxalq Antalya Riyaziyyat Olimpiadasının ölkə üzrə keçirilən mərhələsinin medalçılarının adları aydınlaşıb. Gərgin keçən bilik yarışmasında ən yüksək bal 6-cı siniflər arasında qeydə alınıb. Həsən Süleymanov mümkün 100 baldan 93.75 bal toplaya bilib. Sonrakı ən yüksək bal isə 88.75 xalla 6-cı sinif şagirdi Muhammadəli Bağırzadə və 8-ci sinif şagirdi Alikamal Həsənə məxsusdur. Qeyd edək ki, nəticələr öncədən elan olunduğu kimi, hər sinifdən ilk 10 nəfər qızıl, sonrakı 11-30-cu yerləri tutanlar gümüş, 31-50-ci yerləri tutan şagirdlər isə bürünc medala layiq görülüb. Əgər sərhəd rəqəmlərdə yer alan şagirdin balı ilə ondan sonrakı şagirdin balı eynidirsə, o halda həmin şəxs də eyni medalla təltif olunub. Medallar təyin edilərkən şagird sayı və nəticələrə diqqət yetirilmişdir. Belə ki, 5, 6, 7, 8-ci siniflər yuxarıdakı qaydaya uyğun olaraq, 9, 10, 11-ci siniflər isə şagird sayı və nəticələr nəzərə alınaraq, 40 bal üzəri olanlar qızıl, 30 baldan 39 bala qədər olanlar gümüş, 16 baldan 29 bala qədər olanlar isə bürünc medal əldə edib. Mükafatlandırma mərasimi 25 yanvarda Nizami Kino Mərkəzində təşkil olunacaq. Medal qazanan şagirdlər isə Antalyada, Akdeniz Universitetində 17-22 aprel 2025-ci il tarixlərində təşkil olunacaq final mərhələsində iştirak hüququ qazanıblar.
