9-13 yanvar tarixlərində Vyetnamda Fermat Beynəlxalq Riyaziyyat Yarışmasının final mərhələsi keçirilib. 14 ölkənin iştirakı ilə baş tutan bu nüfuzlu yarışda Global Olympiad Center-in təşkilatçılığı ilə Azərbaycanı təmsil edən 10 şagirdimiz müxtəlif yaş kateqoriyalarında mübarizə aparıb və möhtəşəm nəticələr əldə edib.
Komandamızdan iki şagird dünya üzrə ikinci yer qazanıb:
Uğur Hüseynzadə 8-ci siniflər arasında dünya ikincisi adını qazanıb.
Fərəh Mahmudova böyük siniflər arasında dünya ikincisi olub.
Bundan əlavə, digər şagirdlərimiz də yüksək nəticələr göstərərək gümüş, bürünc medallar və Fəxri Fərmanlar əldə ediblər:
Əziz Hüseynli və Hüseynağa Hüseyn gümüş medal qazanıb.
Rüstəm Axundzadə, Rəna Məmmədli, Ziya İsmayılov və Nihad Paşayev bürünc medal sahibi olublar.
Onur Tahirli və Akif Sadiqov isə Fəxri Fərmanla təltif ediliblər.
Final mərhələsi Vyetnamın Da Nang adasında keçirilib. Şagirdlər yarışdan əlavə, Hoi An qədim şəhəri, Coconut Forest, Ba Na Hills turizm kompleksi, AquaPark və My Son tarixi məkanlarını ziyarət ediblər. Bu səfər zamanı onlar həm tarixi yerlərlə tanış olub, həm də əyləncəli fəaliyyətlərdə iştirak ediblər. Vyetnamda əldə edilən bu uğurlar bir daha göstərir ki, Azərbaycan gəncləri beynəlxalq riyaziyyat arenalarında öz sözlərini deməyə davam edirlər. Bu nailiyyətlər həm də ölkəmizdə gənc riyaziyyatçıların inkişafına göstərilən dəstəyin əhəmiyyətini vurğulayır.