Beynəlxalq Kopernik Olimpiadasının Fizika və Astronomiya üzrə finalı başa çatıb.

ABŞ-ın Hyuston şəhərində 5-10 yanvar tarixlərində keçirilən final mərhələsində komandamız uğurlu nəticə ilə yadda qalıb. 4 nəfərlə təmsil olunan yığmamız 3 kateqoriyada mübarizə aparıb. Şagirdlərimizdən Cəmilə Fərəcova gümüş medal qazanaraq komandamızda ən yüksək nəticə göstərib. Müvafiq olaraq, Üzeyir İsrafilzadə və Rüstəm Yaradanquliyev bürünc medal, Xədicə Qəhrəmanova isə fəxri fərman əldə edib.

Olimpiada çərçivəsində şagirdlərimiz Rice Universiteti ilə tanış olublar. Onlar Hyustonda yerləşən Natural Sciences Muzeyinə baş çəkib və NASA-da təşkil olunan xüsusi vorkşopda iştirak ediblər. Şagirdlərimiz burada kiçik raketlər hazırlayıb və ulduzları müşahidə ediblər. NASA-da olan şagirdlərimiz beynəlxalq səviyyəli tanınmış alimlərlə tanış olub və elmi müzakirələr aparıblar.

Bu uğurda şagirdlərin ailələrinin və təhsil aldıqları məktəblərin böyük dəstəyi olduğunu xüsusilə vurğulamaq istəyirik. Gənclərimizin inkişafına və beynəlxalq səviyyədə uğur qazanmasına verdikləri töhfəyə görə şagirdlərin məktəblərinə Global Olimpiad Center adından dərin təşəkkürümüzü bildiririk.

Əziz şagirdlərimizi təbrik edir və onlara elmi yolda yeni zirvələr arzulayırıq!