Global Olympiad Center-in təşkilatçılığı ilə iyunun 21-də TIMO 2026 final
mərhələsində fəaliyyət göstərəcək könüllülər üçün hazırlıq təlimi keçirilib.
Təlimdə Əməliyyat, Ölkə Koordinasiyası, Logistika və Media komandalarının
üzvləri iştirak ediblər.
Təlimin əsas məqsədi 2-6 iyul tarixlərində Bakıda keçiriləcək TIMO 2026
final mərhələsi zamanı könüllülərin fəaliyyətinin əlaqələndirilməsi, vəzifə
bölgüsünün dəqiqləşdirilməsi və təşkilati proseslərə hazırlığın gücləndirilməsi
olub.
Görüşdə könüllülərə xarici ölkələrdən gələcək iştirakçıların qarşılanması və
müşayiəti, tədbir məkanlarında yönləndirmə, komanda daxili əlaqələndirmə,
nəqliyyat və logistika prosesləri, eləcə də tədbirin gündəlik iş axını barədə ətraflı
məlumat verilib.
TIMO 2026 Təşkilat Komitəsinin rəhbəri Xəyal İbrahimzadə könüllülərə final
mərhələsinin ümumi təşkilati planı, logistika prosesləri və komandalar arasında
operativ əməkdaşlığın təmin olunması ilə bağlı təlimatlar təqdim edib. O, beynəlxalq
tədbir zamanı dəqiq koordinasiyanın, vaxtın düzgün idarə edilməsinin və
iştirakçılarla peşəkar ünsiyyətin əhəmiyyətini diqqətə çatdırıb.
Təlim çərçivəsində Media komandası üçün media savadlılığı mövzusunda ayrıca
sessiya da təşkil olunub. Xəyal İbrahimzadənin apardığı sessiyada ənənəvi media
ilə iş prinsipləri, məlumatların dəqiqliyinin yoxlanılması, müsahibələrin
təşkili, media nümayəndələri ilə ünsiyyət və rəsmi məlumatların ictimaiyyətə
düzgün təqdim olunması məsələləri müzakirə edilib.
Komandaların üzvlərinə tədbir günlərində yarana biləcək müxtəlif
vəziyyətlərdə operativ qərarvermə, məsul şəxslərlə əlaqə və iştirakçıların
müraciətlərinin düzgün istiqamətləndirilməsi ilə bağlı tövsiyələr də verilib.
Qeyd edək ki, TIMO 2026 final mərhələsi 2-6 iyul tarixlərində Bakı şəhərində
keçiriləcək. Müxtəlif ölkələrdən gələcək şagirdlər riyaziyyat üzrə bilik və
bacarıqlarını nümayiş etdirməklə yanaşı, Azərbaycanın tarixi və mədəni
məkanları ilə də tanış olacaqlar.
Global Olympiad Center bildirir ki, könüllülərin əvvəlcədən hazırlanması və
komandalar arasında koordinasiyanın təmin edilməsi beynəlxalq tədbirin uğurlu
təşkilində mühüm rol oynayır.
